العنايه بالبشره فى فصل الشتاء

عدد المساهمات : 56 تاريخ التسجيل : 18/12/2010

السلام عليكم ورحمه الله وبركاته

طبعا
أنتي عارفة إن انخفاض نسبة الرطوبة في فصل الشتاء يؤدي إلى زيادة جفاف
البشرة سواء بشرة الجسم أو الوجه وبالتالي حدوث مشاكل كتير زي مثلا ظهور
قشور بيضاء في بعض أجزاء الجسم أو إنك تحسي إن بشرتك لونها باهت وغير حيوي
بالإضافة إلى تعرض البشرة للجفاف وظهور التشقق في بعض أجزاء منها زي
اليدين والوجه والرجلين..
علشان كده هقول لك دلوقت على شوية نصائح هتساعدك على العناية ببشرتك في فصل الشتاء...

يلا نشوف النصائح دي مع بعض..

النصيحة الأولى
بلاش صابون
شوفي
النصيحة الأولى اللي لازم تاخدي بالك منها هي إنك تبعدي نهائيا عن استخدام
الصابون ومش قصدي هنا إنك تبعدي عن كل أنواع الصابون لا قصدي إنك تبعدي عن
الصابون اللي بيحتوي على روائح معطرة لأنه بيساعد على زيادة جفاف الجسم..
علشان
كده عايزاك طووول الشتاء تستخدمي صابون الأطفال لأن ده بيكون فيه مواد
مغذية وملطفة للجسم وبتعوض الجسم عن الجفاف اللي ممكن يتعرض له نتيجة
عوامل الجو.

النصيحة التانية
لا للمياه الساخنة
طبعا
اللي هتشوف كلمة "لا للمياه الساخنة" دي هتقول إيه ده معقول حد يقدر يعيش
من غير ما يستخدم الميه السخنة ده أنا بخلي الميه تبقى نازلة من الحنفية
بتغلي..
شوفي في حقيقة كتير مننا مش عارفها وهي إن الميه السخنة مضرة
جدا للجسم وهي اللي بتساعد على جفاف الجلد وبالتالي بتساعد على تشققه
علشان كده ياريت تستخدمي في الشتاء مياه فاترة.

النصيحة الثالثة
نشفي بشرتك بفوطة ناعمة
أكيد
كلنا بنتعرض للميه كل شوية يعني علشان الوضوء أو غسل الأيدي مثلا، وعلشان
كده عايزاك تبقي ذكية وكل ما تعرضي بشرتك للميه تنشفيها بالراحة بفوطة
ناعمة وبأكد كلامي فوطة ناعمة، واوعي تسيبيها من غير ما تنشفيها لأن ده
هيزود جفافها ويعرضها للتقشف.
وفيه حاجة كمان حلوة ممكن تعمليها وهي
إنك تدلكي إيدك ووشك بأي كريم مرطب بعد ما تغسليهم، وكمان عايزاك تاخدي
بالك من حاجة مهمة قوووي وهي إنك ماتغسليش وشك أو تستحمي مثلا وتخرجي في
الهواء البارد على طول، لا اقعدي في البيت لمدة ساعتين وبعد كده اخرجيا

لنصيحة الرابعة
ماتكتريش من الماكياج
دي
نصيحة مهمة قوي لازم تاخدي بالك منها في الشتاء وهي إنك ماتكتريش من وضع
الماكياج خاصة "كريم الأساس والبودرة" علشان ما تظهرش حبوب أو بثور سوداء
في بشرتك وده لأن مسام الجسم بتتنفس بصعوبة شديدة في الشتاء..

النصحية الخامسة
اشربي سوائل على قد ما تقدري
كتير
مننا بيقلل من شرب السوائل في الشتاء بالرغم من إن السوائل دي مفيدة جدا
للجسم وده لأنها بتساعد على ترطيب الجسم من الداخل إلى الخارج علشان كده
ياريت تكتري من شرب السوائل زي الميه والعصائر الطازجة طبعا والفواكه اللي
فيها فيتامينات زي "البرتقال واليوسفي"، لأن كل الحاجات دي هتغذي البشرة
وهتبعد عنها الجفاف.

ودى شوية ماسكات سريعة كدة
طريقه عمل ماسك للتفتيح وفي نفس الوقت مرطب لبشرة مركبه

المكونات:
½ جزرة متوسطة الحجم.

¼ ملعقة عسل نحل
الطريقة:
قطعي
نصف الجزرة شرائح واعصريها وصفيها، وبعد ما تحصلي على هذا العصير ضيفي
إليه العسل واخلطي هذا الخليط، وادهني بيه وشك لمدة ربع ساعة، وبعد كده
اغسلي وشك بالماء الدافئ والماسك ده مش بيرطب البشرة وبس، لا ده كمان
بيغذي البشرة بفيتامين أ وبيساعد كمان على تفتيحها

وده كمان ماسك هايل هيساعدك علي التخلص من مشكلة الرءوس السوداء دي بشكل نهائي وهو
ماسك طين البحر الميت
الطريقة
هاتي
4 معالق كبيرة زبادي و 2 معلقة صغيرة طين البحر الميت، و2 معالق صغيرة ماء
بطاطس ثم اخلطي جميع المكونات جيدا لعمل عجينة لينة، وتوضع على الوجه مع
تجنب المناطق الرقيقة حول العينين ومع الاسترخاء لمدة 15 - 20 دقيقة
وبعدين اغسلي وشك بالمية الفاترة.
وخدي بالك أن الماسك ده بيستخدم بمعدل مرة واحدة أسبوعيا وبحد أقصى مرتين أسبوعيا؛ لأنه بيعرض البشرة للجفاف

ده ماسك هايل مناسب جدا للبشرة الجافة والماسك ده هو
ماسك زيت الزيتون بالبيض
المكونات:

صفار بيضة.

ملعقتان زيت زيتون.

ملعقة دقيق.

ملعقتان لبن طازج

الطريقة:
اخلطي
المكونات دي كلها مع بعضها، وبعد كده حطيها على وشك وسيبيها لمدة ربع
ساعة، وبعد كده اغسلي وشك بالماء الدافئ كذا مرة وهتشوفي النتيجة بنفسك

وصفة هايلة لعلاج مشكلة الهالات السوداء
المكونات:
نصف كوب خيار مبشور.

2 ملعقه حليب

بياض بيضه

الطريقة:
تخلط
المكونات جيدا لعمل عجينة رقيقة وتترك على الوجه لمدة 20 دقيقة، ثم يشطف
الوجه بالماء الفاتر. ودي بتساعد على التخلص من الهالات السوداء وكمان
بتساعد على تفتيح البشرة.

عدد المساهمات : 132 تاريخ التسجيل : 16/12/2010

شكرا يا قمر علي المعلومه الحلوه ديه ان شاء الله هاجربها
مانتحرمش من وصفاتك ياقمر

» أقبل الشتاء وكم تمنيت أن تكون معي